CLAUDINE BARRETTO AT RAYMART SANTIAGO
Malungkot na ibinalita ng Kapuso actor Raymart Sanatiago na hindi niya nakasama noong nakaraang Pasko at Bagong Taon ang dalawa niyang anak na sina Sabina at Santino. Sinabi rin nitong tuloy pa rin ang pakikipaglaban niya sa kaso nila ng dating asawa?
“Oo, tuloy pa,” tugon ni Raymart. Natanong siya kung hindi ba siya napapagod sa pabalik-balik sa korte? “Nakakapagod nga…may kuwarto na nga ako du’n (korte)!” biro naman ni Raymart.
Siyempre, natanong din ang Kapuso actor kung naniniwala ba siya sa second chances? “Oo naman. May mga panahon, ‘di ba, na puwede nating itama at binibigyan tayo ng second chance para itama ang mga maling yun?”
E, kung bigyan sila ni Claudine ng second chance na magsama uli, papayag ba siya? “A, yun, wala nang chance yun. Wala nang second chance yun. Yung pagiging magkaibigan? Yun, puwede pa, sa friendship.”
Tungkol naman sa annulment nila ni Claudine, ayon kay Raymart inaayos na nila ito pero ayaw na niyang magdetalye dahil baka makaapekto pa sa kaso nila.
Kasabay nito, nagpakatotoo naman siya nang matanong kung masaya ba siya ngayon sa buhay niya? “Hindi masyado, hindi kumpleto. Makikita niyong masaya ako minsan, pero sa loob, medyo malungkot ako.
“Lalo na sa mga anak ko, yung pamilyang buo. Siyempre, hoping na maayos, pero hindi naging ganu’n. So, hindi rin ganu’n kasaya,” aniya pa.