Mga Laro Ngayon
(TIP-Manila Gym)
2 p.m. Hapee vs Cebuana Lhuillier
4 p.m. Café France vs Tanduay Light
PAGSISIKAPAN ng Hapee na maipagpatuloy ang pangunguna sa 2014-15 PBA D-League Aspirants’ Cup na hindi kasama ang mga key players ng San Beda College sa pagharap sa Cebuana Lhuillier ngayon sa TIP Gym sa P. Casal, Maynila.
Sina Ola Adeogun, Baser Amer at Arthur dela Cruz ay ilan sa mga Red Lions na hindi makakasama ng Fresh Fighters sa larong itinakda sa ganap na alas-2 ng hapon dahil ang San Beda ay lalaro sa finals ng Philippine Collegiate Champions League (PCCL).
Pangunahing arsenal ng Hapee ay ang kanilang depensa matapos magbigay lamang ng 58 puntos sa naunang apat na nakalaban para saluhan ang pahingang Cagayan Valley sa itaas ng team standings.
Determinado naman ang Gems na masilat ang Hapee para maitaas ang kasalukuyang 2-2 baraha.
Ang Café France at Tanduay Light ang magkikita sa ikalawang laro dakong alas-4 ng hapon at nais ng Bakers na makabangon mula nang lasapin ang unang pagkatalo matapos ang tatlong laro sa pamamagitan ng 89-84 double overtime pagkatalo sa Rising Suns.
Kung magtagumpay ang Bakers, lalasapin ng Rhum Masters ang kanilang ikaapat na pagkatalo matapos ang
limang laro para malaglag sa huling puwesto kasama ang tatlong iba pang koponan.