Ngayon pa lang ay nagbubunyi na ang mga tagasuporta ni Willie Revillame dahil sa umiikot na balita na nagkakaroon na sila ng pag-uusap ngayon ng GMA 7.
Nu’ng una ay kuwento-kuwento lang ang lahat, pero nasulat na ‘yun at may mga detalye pa, kaya tuwang-tuwa ang mga tagahanga ni Willie na matagal na matagal nang nasasabik sa kanyang pagbabalik sa telebisyon.
Ayon sa balita ay patago pa ang namamagitang transaksiyon ngayon ng kampo ni Willie at ng network, pero may maitatago ba naman sa mga ganu’n kalaking pag-uusap, natural lang na may makakaamoy nu’n na puwedeng ilipat-lipat sa ibang bibig.
Once a week daw ang game show ni Willie, ilalagay raw ‘yun ng GMA 7 sa weekend, pinaplantsa na raw ngayon ang kontrata ng aktor-TV host na mahal na mahal ng ating mga kababayan.
Kung totoo ang mga lumulutang na balita ay siguradong ikaliligaya ‘yun ng mga lolo at lola at mga nanay na natutuhan nang mahalin si Willie.
“You can’t put a good man down,” komento ng mga nakakausap namin. Na totoo naman. Ilang bagsak at bangon na ba ang career ni Willie Revillame pero sa pagtatapos ng kuwento ay nakababalik pa rin siya sa gitna ng entablado?