Mahabang guhit, suwerte

Sulat mula kay Colina ng Barangay Vintar, Valencia City
Dear Sir Greenfield,
Natatakot ako na hindi ko na maaabot ang pangarap kong maging health worker at lisensiyado ng Professional Regulation Commission balang araw.  Ang aking pag-aaral sa kolehiyo ay nakasalalay palagi sa kikitain ng kapirasong bukid na minana ng aking mga magulang.  Dumaan ang matagal na ulan at binaha ang mga pananim.  Pati nga ang budget sa aming pagkain ay apektado na ng patuloy na pagtaas ng presyo ng lahat na bilihin.  Hindi na nga ako nakapag-enroll at sa susunod na semester ay malabo pa rin.  Walang trabaho rito kaya gusto ko nang mag-abroad pero magulo raw ngayon sa Middle East.  Makapaga-abroad ba ako?  Makatatapos ba ako sa pag-aaral at magiging ganap na lisensiyadong health worker?
Umaasa,
Colina ng Barangay Vintar, Valencia City
Solusyon/Analysis:
Palmistry:
Huwag kang malungkot at mawalan ng pag-asa.  Malinaw ang guhit sa iyong palad at mahaba ang Fate Line (Illustration 1-1 arrow 1.).  Ang ibig sabihin nito, meron kang maaasahang career at magiging abala ka sa buhay.  Ngayong hindi ka muna nakapag-aaral, pilitin mong dumiskarte at ilabas ang iyong nalalaman o talino para kumita ka pansamantala habang nasa Pilipinas pa.
Cartomancy:
Five of Diamonds, Two of Hearts at Six of Hearts ang lumabas (Illustration 1.). Ang mga baraha ang nagsasabing isang maganda at maputing babae ang tutulong sa iyo para makapagtrabaho sa mall, malaking grocery o computer café. Sa nasabing trabaho magsisimula ang maganda mong career, hanggang sa ikaw ay maging successful na working student.
Itutuloy