Handa na sa eleksyon (2)

Sulat mula kay Milo ng Datu Hoffer Ampatuan, Maguindanao
Problema:
1.      Tulad ng maraming politiko, ngayon pa lang ay naghahanda na akong tumakbo sa susunod na eleksyon.  Bata pa ako ay tambay na ako ng barangay.  Hanggang sa nang binata na ay sumasama na ako sa mga politiko.  Hindi pa naman sinlaki ng malalaking pangalan sa politika ang pangalan ko pero kilala rin naman ako kahit paano dahil sa aking paglilingkod sa barangay at munisipyo.
2. Bukod sa mataas na pangarap sa politika, aaminin kong gusto ko ring guminhawa pero hindi ako magnanakaw.  Hindi ko inaasahan na dadalhin ako ng malalaking politiko pero may kakayahan din naman akong manalo kahit nasa minorya lang.  Manalo kaya ako?  Ako’y isinilang noong Okt. 15, 1972.
Umaasa,
Milo ng Datu Hoffer
Ampatuan, Maguindanao
Solusyon/Analysis:
Astrology:
Ang zodiac sign mong Libra (Illustration 2.) ang nagsasabing sa tulong ng mga alalay mo na may zodiac signna Taurus, Aquarius, at Gemini, tiyak ang magaganap, maraming maniniwala sa inyong plataporma na “pagbabago”. Sa ganyang adhikain, tuloy-tuloy na kayong magtatagumpay.
Numerology:
Ang birth date mo ay nagsasabing simula ngayon, umpisahan na ang pagpapakilala at pakikisalamuha, o laging maglalabas ng bahay at tumulong sa inyong mga ka-Barangay.  Makikita mo pagsapit ng araw ng eleksyon, higit na mananaig ang inyong grupo kaysa sa inyong mga kalaban.
Luscher Color Test:
Dilaw ang pinakamapalad mong kulay o kaya’y pula. Iyan ang gamitin mong uniporme tuwing maglilibot. Sa ganyang paraan, lalakas ang karisma mo sa mga botante, at sa araw ng eleksyon hindi ka nila makakalimutang isulat sa balota.
Graphology:
Upang matiyak ang iyong panalo, bahagyang inobasyon ng lagda ang ipatupad. Sa halip na pasubsob pababa ang dulong bahagi ng iyong lagda. Paangat paitaas ang dapat. Sa ganyang lagda, papataas ang dulo, siguradong magtatagumpay ka sa lahat ng iyong hangarin at ambisyon sa buhay.
Huling payo at paalala:
Milo, ayon sa iyong kapalaran nakatakda at hindi na nga maiiwasan ang magaganap, isang sopresa at napakagandang pangyayari ang iyong mararanasan, at lalamang ka sa iyong kalaban, kaya masasabing ang iyong pagkapanalo ay dala pa rin ng suwerte dahil sa likas mong taglay na magandang kapalaran.