“Steady sa P20 million.” Ito ang sabi sa amin ng taga-Star Cinema nang tanungin namin ang kinikita ng “Maybe This Time” simula nu’ng nagbukas ito noong Miyerkules.
Noong Huwebes at Biyernes daw ay P20 million din ang kinita ng pelikula nina Coco Martin at Sarah Geronimo at inaasahan mas tataas ito ngayong weekend.
Kung hindi raw magbabago ang takbo ay posibleng kumabig ng P250 hanggang P300 million ang unang pelikula ng tambalang “CoSa”. Ngayon pa nga lang ay marami na ang nagre-request na sana ay may part two rin ang pelikula.
Idinirek ni Jerry Lopez Sineneng ang “Maybe This Time” ay isang love story tungkol sa dalawang tao na matututunan ang kahalagahan ng pagiging totoo sa kanilang mga sarili upang magwagi at manaig ang pag-ibig.
Tampok din sa “Maybe This Time” sina Ruffa Guttierez, Ogie Diaz, Dennis Padilla, Marlann Flores, Zeppi Borromeo, Garlic Garcia, Minnie Aguilar, Boboy Garovillo at Sharmaine Buencamino.
Samantala, base sa panayam kay Coco tungkol sa pagtabo sa takilya ng “Maybe This Time”, “Hindi ako makapaniwala, hanggang pag-uwi ko sa bahay halos hindi ako makatulog.
Kaya nga sabi ko hindi lang nila alam kung gaano ako kaligaya na hindi ko inakala na makakagawa ako ng ganitong klaseng pelikula.”
Kung may isang eksena raw sa pelikula ang talagang gustung-gusto ni Coco, ito ay, “‘Yung dulo sobra akong kinilig. Sabi ko nga kahit ako nga artista sobrang kinilig. Pero sabi ko masaya eh, kikiligin ka at papaiyakin ka.”
At alam n’yo ba, halos lahat pala ng dialogue nila ni Sarah sa ending ng movie ay wala na sa script, ani Coco, “Yung mga dialogue namin, ‘yung adlib-adlib namin, kami na ‘yun eh.
Kumbaga, basta si direk, inupo lang kami, (sabi niya) ‘Bahala na kayo ha,’ kumbaga ‘yun na tinatawag na chemistry.”
Nakakatuwa rin si Coco bossing Ervin, dahil lahat ng taong naghirap at nagpuyat para mabuo ang “MTT” ay personal niyang pinasalamatan with matching bulaklak. Kay Sarah kaya ano ang ibinigay ni Coco?
( bandera.ph file photo )