LUMABAS kahapon si Southeast Asian Games long jump multiple gold medalist Henry Dagmil para idiin ang mga PATAFA national coaches na sina Joseph Sy at Rosalinda Hamero.
Ayon kay Dagmil, na humarap sa mamamahayag sa pagpupulong na ginawa sa tanggapan ni PSC commissioner Jolly Gomez, pinabayaan umano siya ni Sy mula noong pumasok siya sa national team noong 2000.
Si Dagmil ay napabilang sa national team dahil kay Sy na coach din niya sa Mapua noon. “Since napasok ako sa national team noong 2000, wala siyang ibinigay na programa sa akin.
Halos on my own ako sa pagsa-sanay,” wika ni Dagmil. Aniya, nakuha lamang niya ang ginto sa Myanmar SEAG dahil sa sariling kayod at pakikipag-ensayo sa kapwa atleta.
Binanggit pa niya na mahirap magreklamo laban sa mga coaches na sina Sy at Hamero dahil “makapangyarihan sila at puwede nilang tanggalin ang mga pambansang atleta sa koponan.”
“Halos parang presidente na siya ng PATAFA lalo na noong hindi nagpupunta sa office si Mr. Go Teng Kok. Binantaan na rin niya ako na tatanggalin sa team,” wika pa ng 32-anyos na si Dagmil na nanalo ng ginto noong 2013 Myanmar SEA Games para isama sa kolekyon ng ginto sa 2005 Manila at 2007 Thailand Games.
Si Dagmil ang unang national athlete ng Philippine Amateur Track and Field Association na lumabas para pagtibayin ang desisyon ni Gomez na ipinatanggal sina Sy at Hamero bilang mga national coaches dahil nagpapabaya sa kanilang trabaho.
Ngunit apat na iba pa sa pangunguna nina coach Arnold Villarube at Jesson Ramil Cid na nanalo rin ng ginto sa Myanmar, ay naglabas ng affidavit na nagsasaad na hawak ni Sy ang kanilang ATM card dahil may pagkakautang sila rito.
Ayon kay Gomez, idadagdag niya ang bagay na ito sa mga akusasyon niya laban kay Sy. Inamin naman ni Dagmil na maging siya ang kusang lumapit kay Sy para mangutang at ito ay nabayaran na niya noong 2012. Agad namang ibinalik ng coach ang kanyang ATM card matapos siyang magbayad.
( Photo credit to INS )