GINAWA ni Michael Christian Martinez ang lahat ng makakaya pero sa huli ay nakontento na lamang siya sa ika-19th puwesto sa pagtatapos ng men’s singles figure skating sa 2014 Winter Olympics sa Sochi, Russia noong Biyernes ng gabi.
Subalit hindi naman nasayang ang magandang ipinamalas ni Martinez dahil ginantimpalaan siya ni businessman/sports patron Manny V. Pangilinan ng $10,000 (P440,000).
“Just emailed Mrs. Martinez that MVPSF (Manny V. Pangilinan Sports Foundation) at request of @iamMVP (Manny V. Pangilinan) has authorized a bonus of US$10k in recognition of Michael’s historic performance,” sabi ni Chot Reyes sa kanyang Twitter account (@coachot) kahapon ng umaga.
Si Reyes ay nakakatuwang ni Pangilinan sa sports development. Nasiyahan uli ang mga nanood sa Iceberg Skating Palace habang binibigyan ng buhay ng 17-anyos na si Martinez ang tugtuging Malaguena sa free stake program.
Ang mahirap na triple axle at loops ay madali niyang ginawa tulad sa ipinakita sa short program noong Huwebes at maliban sa isang pagdulas, masasabing tunay na maganda ang ipinakita ng skater na kauna-unahang Pinoy at Southeast Asian na nasali sa kompetisyon.
Ang routine ay umani ng 119.44 puntos sa mga hurado at isinama sa 64.81 na nakuha sa short program, nakabuo si Martinez ng 184.25 puntos upang malagay sa 19th puwesto.