Carlos Yulo sa 5th anniv nila ni Chloe: Lord salamat sa regalo n’yong anghel!

IBINANDERA ng celebrity couple na sina Carlos Yulo at Chloe San Jose sa buong universe ang pagse-celebrate nila ng kanilang 5th anniversary.

Makikita sa Instagram ang mga litrato na kuha sa kanilang anniversary date sa Tagaytay kalakip ang sweet message nila para sa isa’t isa.

Ang pamatay na mensahe ng two-time Olympic gold medalist sa kanyang pinakamamahal na si Chloe, “Mula sa palitan ng mga matatamis na salita papunta sa mga matatamis mong labi, sa mga yakap mong hinahanap ko palagi…

“Sa presensya mong nakakahawa ng saya at pag mamahal mong walang katumbas. 

“Dati sa cellphone lang kita nakakausap at nakikita, ngayon araw araw na tayong magkasama. thank you G!” saad ni Carlos.

Dagdag pa niya, “Lord God marami pong salamat sa regalo nyong anghel na nagsilbing gabay para matuto, maging mabuti, magmahal at higit sa lahat mas mapalapit SAYO. 

“Aalagaan, mamahalin at poprotektahan ko po ang lahat ng ito.

“Grateful and thankful po ako sa mga challenges and blessings na binibigay nyo po para mas patatagin at mas mahalin pa namin ng husto ang isa’t isa. 

“Muli, maligayang anibersaryo sa atin mahal ko. Mahal na mahal kita.”

Sa hiwalay na post naman ni Chloe, nabanggit niya na super grateful siya sa pagiging girlfriend ni Carlos at nagpapasalamat siya sa lahat ng ginagawa nito para sa kanilang relasyon.

“I’m so grateful to the universe for writing this life with you in it. We’ve grown so much and have been through a lot, individually and as a team and I’m just really proud of us, mahal. Thank you for making love feel safe and steady.

“Happiest 5th anniversary, dada!! Here’s to more years of choosing each other: on the good and hard days, more memories and random ‘let’s book a flight’ moments and everything in between,” sabi pa ni Chloe.