Gwen Garcia inendorso si Kiko bilang ika-11 Senatoriable ng One Cebu

PORMAL nang inendorso ni Cebu Governor Gwendolyn Garcia si Senador Francis “Kiko” Pangilinan bilang ika-11 kandidato sa pagka-senador ng makapangyarihang grupong politikal na One Cebu, na siyang kauna-unahang kandidatong hindi kabilang sa administrasyon na sinuportahan ng lalawigan.

Sa kanyang talumpati sa harap ng mga lokal na opisyal mula sa ika-5 at ika-6 na distrito ng Cebu noong Martes ng gabi, buong loob na ipinahayag ni Garcia ang kanyang suporta kay Pangilinan. Binanggit niya ang kanilang matagal nang pagkakaibigan at ang katapatan ng senador, na aniya’y hindi nagbabago kahit pa iba-iba ang pulitikal na mga alyansa.

“Pagiging palagian at matatag. Iyan ang tanda ng tunay na pagkakaibigan. Iyan ang tanda ng tunay na tao,” sey ni Garcia.

Inilarawan niya ang kanilang relasyon bilang isang pagkakaibigang tumatag sa kabila ng pabago-bagong politika.

Baka Bet Mo: Frankie Pangilinan nanawagan sa lahat ng mayor na suportahan si Kiko

“Diyan mo talaga makikita kung anong klaseng tao siya,” dagdag pa ng gobernadora habang umani ito ng masigabong palakpakan mula sa mga kapitan ng barangay at alkalde sa lugar.

Nagpasalamat naman si Pangilinan sa suporta ni Garcia, na aniya’y dumating sa isang mahalagang yugto ng kanyang kampanya.

Sa mga nagdaang linggo, nakatanggap ang senador ng sunod-sunod na pag-endorso mula sa iba’t ibang grupo at sektor sa bansa.

“Lubos po akong nagpapasalamat kay Governor Gwen sa kanyang suporta at tiwala. Naniniwala kaming sa patuloy niyang pamumuno, lalo pang uunlad ang One Cebu,” ani Pangilinan.

Sa buong kampanya, iginiit ni Pangilinan ang kahalagahan ng pagtutulungan sa kabila ng magkakaibang paniniwala sa politika, lalo na upang maisulong ang mga polisiya na makakapagpababa ng presyo ng pagkain at makakatulong sa pagpigil sa inflation.

Ayon sa kanya, kapag abot-kaya ang pagkain, mas kayang makaraos ng karaniwang Pilipino.

Sa kanyang talumpati, ibinahagi rin ni Garcia ang ilang personal na karanasan niya kay Pangilinan.

Naalala niya ang isang okasyon noong dekada 2000 na pinuntahan siya ng senador upang kamustahin.

“Talagang pinuntahan ako ni Kiko para lang batiin at kumustahin ako. Sinabi pa niyang ipaabot ang pagbati kay Pablo John. Napaka-personal ng gestong iyon at talagang na-touch ako,” wika niya.

Dumating ang endorsement na ito ilang araw matapos suportahan si Pangilinan ng mga pangunahing lider ng Bangsamoro.

Noong nakaraang linggo, bumisita ang senador at ang kanyang asawang si Sharon Cuneta sa Camp Darapanan sa Sultan Kudarat.

Doon, tinanggap sila nina dating Bangsamoro chief minister at MILF chair Ahod Ebrahim at vice chair Mohaqer Iqbal, na kapwa nagpahayag ng kanilang suporta.

Nauna nang sinabi ni Garcia na sampung kandidato lamang mula sa administrasyon ang kanyang susuportahan sa ilalim ng Alyansa sa Bagong Pilipinas.

Ngunit ibinunyag niyang ang ika-11 niyang kandidato ay isang matalik na kaibigan — at ito ay walang iba kundi si Pangilinan.