Derma to the rescue: 5 skin care tips para ‘fresh’ at ‘blooming’ pa rin sa tag-init

HINDI lang pawis ang kalaban tuwing tag-init dahil pati balat mo, pwedeng masira sa sobrang init!

Kaya kung gusto mong maging fresh, blooming, at healthy skin all summer, sundin ang limang ultimate skin care tips mula mismo sa eksperto at dermatologist na si Dr. Sheehan Mae Tolentino-Almadani ng Skin Avenue MD sa Pasig City.

1. Mag-Sunscreen ka!

“Prevention is better than cure,” sey ng ating dermatologist, kaya hindi dapat pinapalampas ang sunscreen tuwing tag-init.

Gamitin ang SPF 30 pataas para at least 97% protektado ka mula sa UV rays.

Baka Bet Mo: Derma to the rescue: Paano iwasan ang bungang araw, sunburn tuwing tag-init?

Piliin din ang broad spectrum at water-resistant sunscreen na perfect kahit mag-swimming o pagpawisan ay hindi ito matatanggal.

“If prolonged ang sun exposure, reapply every 2 to 3 hours,” paalala pa ng doktora.

2. Uminom ng tubig

Giit ni Dr. Sheehan, hydration is key!

Kaya bukod sa mga usong samalamig, tubig din ang sagot para hindi mag-dry at mag-chap ang balat.

“It helps improve our thermal regulation at iwas skin dehydration,” dagdag ni Dr. Sheehan.

3. Maligo, maghilamos bago matulog

Siyempre, bago matapos ang inyong araw at bago matulog, dapat nakapag-wash up na.

Sinabi sa amin ni Dr. Sheehan na importanteng malinis ang balat bago humiga para walang oil, dumi, o make-up residue na magbabara sa pores.

Heto ang additional tip niya, lalo na sa mga kikay diyan: “You can use a mild cleanser and for those na mahilig mag-make up, you can also double cleanse using an oil cleanser or micellar water para ma-remove lahat ng makeup residue sa face.”

4. Pumili ng produkto base sa skin type mo

Hindi porket trending sa TikTok o inirekomenda ng influencer eh swak na sa’yo.

Ayon sa eksperto, bawat balat ay may kanya-kanyang trip kaya mahalagang alamin muna ang skin type mo bago ka gumastos sa skincare.

“Kung ikaw ay may oily skin, you should opt to use products na matifying or oil-free and you can also use gel-based skin products, like moisturizers para mabilis na ma-absorb sa skin and ma-lessen ‘yung oiliness and greasiness sa face,” paliwanag ng doktor.

Patuloy niya, “For those na dry skin naman, better to use cream-based moisturizers and to avoid harsh ingredients, like, exfoliating cleansers or toners and avoid high-potency retinoids para ma-lessen ‘yung irritations sa skin.”

5. Magpa-check kapag may duda!

Kapag may lumitaw na kakaiba sa balat, kuko, o buhok, huwag manghula – dapat magpunta na raw sa doktor upang ipa-check.

Pakiusap ni Dr. Sheehan, iwasan ang self-medication at TikTok tips na walang basehan.

“Always consult a board-certified dermatologist para mas safe at accurate ang treatment,” esplika niya sa amin.

Bukod sa mga nabanggit, nagbigay rin ng bonus tip ang doktora para dagdag proteksyon sa balat ngayong summer.

Ayon sa kanya, magsuot ng wide-brimmed hats, long sleeves, at dark-colored clothes na may UPF o Ultraviolet Protection Factor upang maiwasan ang sunburn at iba pang skin problems na dulot ng mainit at maalinsangang panahon.