Go una sa SWS survey, 9 Alyansa bets pasok sa Magic 12

NANGUNA si re-electionist Senator Christopher “Bong” Go sa pinakabagong senatorial preference survey ng Social Weather Stations (SWS).

Nakuha ni Go ang 45% sa survey ng Social Weather Station (SWS), na isinagawa noong Abril 11 hanggang 15 at sinagutan ng 1,800 rehistradong botante.

Sumunod sa kanya sina ACT-CIS Party-list Rep. Erwin Tulfo (43%) at Sen. Lito Lapid (34%).

Binuo ang Top 5 nina dating Sen. Vicente Sotto III at Sen. Pia Cayetano, na kapwa nakakuha ng 33%.

Baka Bet Mo: Bong Go awang-awa kay Duterte: Alam n’yo bang wala siyang tsinelas?

Nasa ika-anim na puwesto si Sen. Ronald “Bato” Dela Rosa at kapwa nakakuha ng 31% sina Sen. Ramon “Bong” Revilla Jr. at Ben Tulfo para sa ika-pito at ika-walong puwesto.

Ika-siyam si Makati City Mayor Abby BInay (29%) at ika-10 si House Deputy Speaker Camille Villar (28%).

Nasa ika-11 at ika-12 na puwesto ang kapwa dating senador na sina Panfilo “Ping” Lacson (26%) at Manny “Pacman” Pacquiao (25%).

Maliban kina Go at dela Rosa, na kapwa kandidato ng PDP-Laban, at Ben Tulfo, na isang independent candidate, ang siyam na iba pang pumasok sa “Magic 12” ay pawang kabilang sa Alyansa Para sa Bagong Pilipinas.