Benhur Abalos
TINIYAK ni dating Interior Secretary Benhur Abalos na isusulong niya sa Senado ang panukalang National Land Use Act kapag nahalal sa papalapit na midterm elections sa Mayo.
Ayon kay Abalos napakahalaga ng panukala sa usapin ng seguridad sa pagkain sa Pilipinas.
Nababahala raw siya sa mabilis na urbanisasyon dahil nauubos ang mga lupang sakahan o taniman.
“Ito ay tungkol sa pagkain. Ito ay tungkol sa buhay. Ito ay tungkol sa kinabukasan natin. Kung wala tayong food sustainability, inilalagay natin sa alanganin ang ating hinaharap,” sey ng dating interior secretary sa mga reporters bago ang campaign rally ng Alyansa Para sa Bagong Pilipinas sa Sta. Rosa City, Laguna kamakailan.
Baka Bet Mo: Abalos naantig sa ‘Balota’, may panawagan para sa mga guro sa 2025 Elections
Hinikayat ni Abalos ang mga lokal na pamahalaan na gumawa na ngayon ng hakbang upang hindi mabili ng mga negosyante ang mga lupa sa kanilang lugar.
“Ang maaari nating gawin ay magbigay ng insentibo sa lokal na antas upang magdalawang isip ang mga may-ari ng lupa bago ito ibenta,” dagdag pa niya.
Bukod diyan, umapela rin si Abalos na buhusan ng suporta ang mga magsasaka sa pamamagitan ng maayos na imprastraktura, abot-kayang pautang, at mas murang crop insurance.