Rodrigo Duterte
MISS na miss na raw ni dating Pangulong Rodrigo Duterte ang ilan sa mga paborito niyang mga food – ang tuyo at munggo.
Ayon kay former Executive Secretary Salvador Medialdea, mas maayos na raw ang kundisyon ngayon ni Duterte kumpara noong kasagsagan ng pag-aresto sa kanya sa bisa ng arrest warrant na inusyu ng International Criminal Court (ICC).
Nasa kustodiya pa rin ng ICC sa The Hague, Netherlands ang dating presidente kung saan lilitisin ang isinampa sa kanyang kaso na “crimes against humanity.”
Base sa video na inilabas ni Atty. Harry Roque sa social media, nagbigay ng update si Medialdea tungkol sa dating pangulo ng bansa.
“Okay naman siya, he’s very in high spirits. Naiisip niya mga sumusuporta sa kaniya, nagpapasalamat siya sa inyong lahat, ituloy n’yo lang ang dasal,” ang mensahe raw ni Medialdea para sa publiko.
“Isa sa mga nami-miss niya ang kanyang usual na kinakain, yung tuyo, munggo, at higit sa lahat yung piniritong saging. Yun ang nawawala sa kaniya.
“Other than that, he is okay basta’t keep on praying for him. Maraming salamat po,” pahayag pa ng malapit na kaibigan ni Digong.
Masayang pahayag pa ni Medialdea, maganda rin daw ang itsura ngayon ni Duterte dahil nakatulog na ito nang maayos.
Dagdag pa ng dating executive secretary sa ilalim ng administrasyon ni Duterte, tumagal lamang ng isang oras ang pagbisita niya sa dating pangulo alinsunod sa protocol na ipinatutupad ng ICC.
Nitong nagdaang Sabado, March 15, malungkot na ibinalita ni Sen. Bong Go na hindi umano ibinibigay ng ICC ang gamot ni Duterte kaya mukhang hinang-hina ito nang humarap sa Pre-Trial last March 14.
“Ikuwento ko lang sa inyo ‘yung huli kong balita kay Tatay Digong. Alam n’yo nakausap ko kaninang madaling araw si Atty. Medialdea pagkatapos ng hearing nila saka si Ma’am Honeylet.
“Kaya siya (Duterte) ganu’n magsalita (sa ICC Pre-Trial hearing), dalawang dahilan – maaaring nag-a-adjust siya sa oras at ang pinakamasakit sa lahat ‘yong sinabi sa akin ni Atty. Medialdea na hindi binibigay sa kanya ‘yung gamot niya.
“Alam n’yo ba, ni hindi nga niya alam kung ano ‘yong gamot na iniinom niya, binibigay sa kaniya ng nurse niya.
“Anong gustong gawin nila kay Tatay Digong? Kung kaya nilang ipadala si Tatay Digong doon, gawan n’yo ng paraan kung paano siya ibalik dito,” litanya ng senador.