Jesi Corcuera
BABY girl ang ipinagdadalang-tao ng “StarStruck” Avenger at proud transgender man na si Jesi Corcuera.
Hindi pa man isinisilang ni Jesi ang kanyang magiging anak na nabuo sa pamamagitan ng artificial insemination, ay may tawag na siya rito — si Baby Ninja.
Sa panayam ng “Fast Talk With Boy Abunda” nitong nagdaang Martes, nabanggit ng ka-batch nina Aljur Abrenica at Kris Bernal sa “StarStruck” ang una niyang ginawa nang malamang successful ang kanyang pagbubuntis.
“Noong nalaman ko na buntis na ako, namili kami kaagad ng gamit. Tapos hindi ko alam ‘yung tawag doon sa baru-baruan.
“Ang tingin ko doon parang damit ng Ninja. So, sabi ko, ano ba ‘yung pang-Ninja na damit?” masayang kuwento ni Jesi.
Baka Bet Mo: Ex-PBB housemate at proud transman na si Jesi Corcuera buntis
Dito, ipinaliwanag din ni Jesi kung bakit gusto niyang magkaroon ng sariling anak, bukod sa mga anak ng partner niyang si Camille.
“May pagkakataon kasi na hindi ko naiintindihan si Camille as a parent. Parang may mga times na nagseselos ako. Isa ‘yon sa reason. And kapag tumatanda ka na natatakot kang maging mag-isa,” esplika pa niya.
At dahil nga nagdesisyon siyang magkaanak sa pamamagitan ng artificial insemination, talagang itinigil niya ang pag-take ng mga gamot (transition sa pagiging lalaki) bilang paghahanda sa kanyang pagbubuntis.
Pagpapatuloy pa niya sa pinagdaanang proseso, “In the making talaga nito ni baby halos 3 years, ‘yun pa lang sa decision making sobrang hirap na po.”
“Hindi ko kayang gawin natural way. So, artificial insemination,” aniya pa.