Hidilyn Diaz at Luisa Madrigal
PINUSUAN at ni-like ng sandamakmak na netizens ang paandar na pagko-cosplay ng weightlifting champion na si Hidilyn Diaz.
Maraming naaliw sa ipinost ng Olympic gold medalist sa kanyang Instagram Stories kung saan ginaya niya ang isa sa mga sikat na character sa hit Disney animated film na “Encanto.”
Makikita sa IG photos ni Hidilyn ang pagsusuot niya ng “costume” ala-Luisa Madrigal, ang gumaganap na kapatid ng lead character sa “Encanto” na si Mirabel.
In fairness, kitang-kita ang pagkakapareho ng karakter ni Luisa kay Hidilyn lalo na ang taglay nitong super powers na kering-keri magbuhat ng mabibigat na bagay, kabilang na ang mga bahay at tulay.
Ang nakasulat na caption sa litratong ibinahagi ni Hidilyn sa IG ay, “Same same, but different.”
Ito naman ang caption niya sa kanyang photo, “Tina-try ko maging Luisa Madrigal kasi sabi niyo ako ‘yun. Kaso waley, ‘di pasok makeup, hair, and outfit ko.”
Sunud-sunod naman ang reaksyon ng mga netizens sa nakakaaliw na post ni Hidilyn na nagsabing siyang-siya raw ang karakter ni Luisa sa “Encanto.”
In fact, nang una raw nilang mapanood ang nasabing Disney movie ay si Hidilyn agad ang naisip nila sa karakter ni Luisa, lalo na nang ipakita nito ang taglay niyang kapangyarihan.
Noong July 2021, gumawa ng kasaysayan si Hidilyn, bilang kauna-unahang Filipino na nakapag-uwi ng gold medal mula sa Tokyo Olympics matapos magwagi sa weightlifting competition.
Natalo niya ang walo pang atleta sa sinalihang kategorya kabilang na ang world record-holder na si Liao Qiuyun mula sa China.
Ilang buwan makalipas ang pagkapanalo niya sa Tokyo Olympics, muling bumandera sa mga headline ang pangalan ni Hidilyn nang ihayag niya sa buong mundo ang engagement nila ng kanyang coach at boyfriend na si Julius Naranjo.
https://bandera.inquirer.net/289270/pinoy-weightlifting-fairy-hidilyn-diaz-tatanggap-ng-p30-m-para-sa-nasungkit-na-olympic-gold-medal