Jaclyn Jose, Andi Eigenmann, Ellie, Lilo at Koa
MALUNGKOT na masaya ang naging selebrasyon ng Pasko ni Andi Eigenmann dito sa Manila kasama ang kanyang tatlong anak.
Bukod sa pagsalanta ng super typhoon Odette sa Siargao at sa iba pang bahagi ng bansa, hindi nakasama ng aktres ang fiancé na si Philmar Alipayo nitong nagdaang Christmas.
Pero naging masaya at memorable pa rin kahit paano ang selebrasyon ng kapaskuhan para kay Andi sa mga anak nila ni Philmar dahil nakapiling naman nila ang inang si Jaclyn Jose.
Nag-post si Andi sa Instagram ng kanyang litrato kasama ang award-winning veteran actress with her daughters Ellie, Lilo and Koa.
Aniya sa caption, “Silver lining: Nakapiling namin si Nanay ngayong Pasko.”
Sabi ng aktres na naninirahan na ngayon sa Siargao, ilang araw bago manalasa ang bagyong Odette sa Visayas at Mindanao, lumipad patungong Maynila si Andi kasama ang mga anak.
Aniya, halos isang taon din siyang hindi nakauwi sa Manila para dalawin ang ina at iba pang mga kapamilya. Naiwan naman sa Siargao ang kanyang partner.
At habang inaayos pa ng grupo ni Philmar ang kanilang tahanan sa Siargao na winasak din ni Odette, mananatili muna sa Maynila si Andi at ang kanyang mga anak.
Pero in fairness, kahit nasa Maynila ang aktres, tuluy-tuloy pa rin ang pagbibigay nila ng tulong para sa mga nasalanta ng super typhoon pati na rin sa muling pagbangon ng isla ng Siargao.
Samantala, ramdam na ramdam din ng netizens at supporters ni Philmar ang kanyang pangungulila habang nagse-celebrate ng Christmas sa Siargao. Miss na miss na raw niya ang pamilya.
Nag-post ang surfer ng photo nina Andi, Ellie, Lilo at Koa na may caption na, “Best gift sako kinabuhe (Best gift ng buhay ko). Miss you and love you all so much! Will see you soon.”
Nag-reply naman si Andi sa hugot post ni Philmar, aniya, “We miss you so much.”
https://bandera.inquirer.net/290914/andi-ibinandera-ang-wagas-na-pagmamahal-kay-philmar
https://bandera.inquirer.net/301310/philmar-miss-na-miss-na-sina-andi-at-mga-anak-see-you-soon