Diego Loyzaga at Barbie Imperial
SIGURADONG malakas ang magiging laban ng celebrity couple na sina Diego Loyzaga at Barbie Imperial sa pagka-best actor at best actress sa susunod na awards season.
Napanood na namin ang first movie nila together na “Dulo” sa ginanap na special screening nito kagabi sa Fisher Mall cinema na dinaluhan nina Barbie at Diego at ng iba pang members ng cast.
Unang-una, pinatunayan ng magdyowa na talagang napakalakas ng chemistry nila on screen at natural na natural ang ipinakita nilang akting sa movie — as in no acting-acting ang ginawa nila dahil totoong-totoo ang bawat eksena.
Habang pinanonood namin ang “Dulo” ay parang kasama rin kami nina Dex (Diego) at Bianca (Barbie) sa kanilang journey bilang live-in partners hanggang sa magpakasal na sila at daanan ang matitinding challenges as young married couple.
In fairness, talagang affected kami sa pelikula lalo na sa mga nakakalokang confrontation scenes nina Babie at Diego dahil napapasigaw at napapamura rin kami sa palitan nila ng hugot.
Agree kami sa sinabi ng dalawang bida ng “Dulo” na nakakapagod at nakaka-drain ang kanilang “fight scenes” dahil sa napakahabang mga dialogue nila lalo na nang sumabog na ang galit nila sa isa’t isa.
Ang galing-galing nang umiyak ni Diego, as in mararamdaman mo na may malalim siyang pinaghuhugutan lalo na sa eksenang galit na galit siya sa tatay niya sa kuwento na nambabae at iniwan sila ng kanyang ina.
Pero hindi rin nagpatalbog si Barbie na tumodo rin sa eksenang halos magkapalitan na sila ng mukha ni Diego habang iyak nang iyak at nakikipagsigawan dahil sumabog na ang galit niya.
Sigurado kaming maraming makaka-relate sa mga eksenang ito lalo na ang mga young couples na nagsasama na bilang live in partners at yung mga bagong kasal pa lang na hindi pa talaga kilala ang isa’t isa.
Pareho kasing nasa early 20s pa lang ang edad nina Dex at Bianca nang magkakilala sila sa isang dating app, at hindi nga nagtagal ay nag-live in na sila.
Naging mabilis nga ang mga pangyayari sa kanilang relasyon, at isang taon lang pagkatapos nilang ikasal, nanganganib na silang maghiwalay.
Sa pag-asang maaayos pa nila ang mga problema, nagdesisyon silang mag-unwind at mag-road trip at dito nga nagsimula ang pelikula kung saan binalikan ang pagsisimula ng kanilang love story.
Ngunit kasabay ng pagbalik ng kanilang masasayang alaala, isa-isa ring bumalik ang mga lumang issues at problema nila, at di nila maiwasan na mag-away.
Hindi na namin ikukuwento kung ano ang naging “dulo” ng kanilang road trip — kung may happy ending ba sila o tuluyan ding naghiwalay. Basta ang masasabi ko lang, perfect sa pelikula sina Barbie at Diego.
Sabi nga namin, kapag nabigyan pa ng mas maraming challenging projects ang reel and real life couple hindi imposibleng marating din nila ang estado nina Hilda Koronel, Maricel Soriano, Vilma Santos, Nora Aunor, Christopher de Leon, Richard Gomez, Albert Martinez at iba pang respetado at premyadong aktor sa local showbiz.
Samantala, bukod sa ito ang unang movie team-up nina Barbie at Diego, isa pang kaabang-abang sa “Dulo” ay ang official soundtrack nito na inawit ng The Juans, ang “Anghel” at “Dulo”. Dahil sa music at lyrics ng kanta, mas lalong nagiging heartbreaking ang bawat eksena sa pelikula.
Mapapanood na ang “Dulo” directed by Fifth Solomon, simula bukas, Dec. 10, streaming online sa Vivamax Philippines, Hong Kong, Taiwan, Thailand, Malaysia, Indonesia, Singapore, Japan, South Korea, Macao, Vietnam, Brunei, Maldives, Australia, New Zealand, the Middle East at Europe. Available na rin ang Vivamax sa USA at Canada.
https://bandera.inquirer.net/282328/diego-kay-barbie-para-siyang-nanay-mag-alaga-pero-para-ring-baby
https://bandera.inquirer.net/299655/payo-nina-diego-at-barbie-sa-mga-magdyowa-dont-lie-dont-cheat-maging-honest-kahit-masakit