NANGYAYARI pala talaga sa totoong buhay ang mga eksena sa pelikula kung saan natitimbog ang panloloko ng karelasyon gamit ang global positioning system o GPS.
Thanks to GPS dahil nabisto ng isang Mister ang kanyang asawang kumakalaguyo ng isang pulis sa isang hotel sa Quezon province.
Batay sa spot report na inilabas ng Philippine National Police (PNP), nangyari ang insidente nito lamang Nobyembre 5, 2:30 ng hapon sa Barangay Bocohan, Lucena City.
Wais din si Mister dahil matapos sundan gamit ang GPS ang kanyang asawa, agad itong nakipagtulungan sa mga pulis.
Pinuntahan naman nila ito sa sinabing hotel at doon nga nahuli ng Mister ang isang PNP member na nakadestino sa Quezon Provincial Health Service Unit. Ang nakakaloka, nakabalot lamang ng tuwalya ang pulis habang ang kanyang asawa ay hubo’t hubad.
Ayon sa PNP, “maaaring mayroong sexual relationship” ang dalawang suspek na nakita sa hotel.
Inaresto naman ang babae dahil sa adultery habang ang pulis na kinasama nito ay nakatakas.
Sa ilalim ng Article 333 ng Revised Penal Code, tumutukoy ang adultery sa relasyon ng babae sa ibang lalaki na hindi niya asawa. Dito, sasampahan ng kaso ang kumakabit na lalaki at ang misis.