Ang cctor na si Tom Cruise sa set ng “Mission Impossible 7.” (Reuters)
LOS ANGELES — Ipinatigil ng dalawang linggo ang filming sa Britain ng pinakahuling “Mission: Impossible” matapos na magpositibo sa coronavirus ang ilang miyembro ng produksyon, ayon sa pahayag ng Paramount Pictures nitong Huwebes.
Hindi sinabi ng movie studio kung ilan at sino ang mga na-test na positibo sa Covid-19 pero ayon sa British newspaper na Sun hindi kabilang doon ang bida ng pelikula na si Tom Cruise.
“We have temporarily halted production on Mission: Impossible 7 until June 14th, due to positive coronavirus test results during routine testing. We are following all safety protocols and will continue to monitor the situation,” wika ng Paramount sa pahayag.
Sa ulat ng Sun na base sa mga di pinangalanan na sources, 14 na myembro ng production ang nagpositibo matapos ang shooting ng isang eksena sa nightclub. Si Tom Cruise at iba pang kasama sa set ay kailangang mag-self-quarantine sa loob ng 14 na araw.
Ang “Mission: Impossible” ay isa sa pinakamalaking prangkisa sa Hollywood. Kabilang ang ikapitong pelikula sa serye sa mga naunang produksyon na ipinasara dahil sa pandemya. Itinigil nito ang filming sa Venice, Italy noong Pebrero 2020.
Nagpatuloy ang shooting noong nakaraang taon sa ilang bansa tulad ng Norway, Italy at Britain.
Ang “Mission: Impossible 7” ay nakatakdang ipalabas sa Mayo 2022.