NA-EXCITE at abangers na ngayon pa lang ang mga tagasuporta ng award-winning OPM group na Ben&Ben at ang mga fans ni John Lloyd Cruz.
Feeling kasi nila ay magkakaroon ng bonggang collaboration ang Ben&Ben at ang award-winning actor matapos mag-post ng litrato ang isang miyembro ng grupo sa social media kasama si Lloydie.
Ibinahagi ng isa sa mga vocalist ng banda na si Paolo Guico sa Twitter ang photo nila ng nagbabalik-showbiz na aktor. Nilagyan niya ito ng caption na, “May dumalaw sa Ben&Ben house.”
Walang binanggit na detalye ang singer-songwriter kung bakit nakipagkita si Lloydie sa kanila pero ang paniwala nga ng kani-kanilang supporters ay posibleng meron silang nilulutong project together.
Kaya naman ngayon pa lang ay excited na silang malaman kung ano ito at nangakong susuportahan nila kung anuman ang gagawin nilang proyekto at nakasisiguro raw silang magiging successful ito.
In fairness, kilala naman ang Ben&Ben sa pakikipag-collab sa mga sikat at bigating celebrities na talaga namang pinag-uusapan at pumapatok sa madlang pipol.
Kamakailan nga lang ay nakipag-team up sila sa reel and real life partners na sina Kathryn Bernardo at Daniel Padilla. Sila ang bumida sa music video ng grupo para sa hit song nilang “Sa Susunod Na Habang Buhay.”
Ano nga kaya ang tunay na dahilan ng pagdalaw ni John Lloyd sa Ben&Ben house? Yan ang dapat abangan ng lahat ng kanilang tagasuporta.