Death by hanging ang hatol ng Kuwaiti court sa among babae ng overseas Filipino worker na si Jeanelyn Villavende.
Kinumpirma ng Philippine Embassy sa Kuwait na ang babaeng amo ni Villavende ay hinatulang mabitay habang ang lalaking employer naman ay hinatulang makulong ng apat na taon.
Napatunayan ng korte na pinatay si Villavende ng kanyang among babae.
Sinabi ng embahada na maituturing ito “legal at moral victory.”
Pinasalamatan ng embahada si Foreign Affairs Sec. Teodoro Locsin Jr., at ang Office of the Undersecretary for Migrant Workers’ Affairs.
Pinasalamatan din ng embahada ang pamahalaan ng Kuwait sa naging suporta sa kaso.
Ayon sa embahada, nawa ang kaso ni Villavende ay magsilbing paalala sa lahat na walang sinumang Filipino ang pwedeng gawing alipin ninuman at saanman.