Sabi ni Justin kay Jie-Ann, na naging malapit na niyang kaibigan sa loob ng Bahay ni Kuya, “I really lacked understanding na we don’t live in the same house. If ever you felt offended with those jokes, I wanna say sorry.
“I forgot to realize na iba tayo ng environment. I wanna say sorry because they were insensitive. I’ll try my best to be more sensitive with how you feel,” aniya.
Sa episode na ipinalabas sa programa noong Dis.18 ay nilapitan ni Justin si Jie-Ann, na noo’y dinadamayan ng iba pang housemates matapos makitang malungkot. Ipinaliwanag ng Kwelang Fangirl ng Sarangani na hindi niya nakasanayan ang pagligo araw-araw dahil kinakailangan pa nilang bumili ng tubig.
Kuwento ni Jie-Ann, P12 kada lalagyan ang binibili nila kaya’t tinitipid ng kanyang pamilya ang tubig nila sa bahay.
Naging usap-usapan ng mga netizen sina Justin at Jie-Ann kamakailan nang kumalat ang isang bahagi ng “PBB Connect” livestream kung saan nakapagsalita nga ng masasakit si Justin kay Jie-Ann.
Pero napagtanto ni Justin na mali ang kanyang naging pagtrato kay Jie-Ann kahit pa nagbibiruan silang dalawa kaya humingi ito ng tawad.
Binigyang diin ni Kuya sa housemates at mga viewers ang kahalagahan ng respeto at pag-unawa sa kapwa.
“Tinipon ko kayo rito sa aking bahay na may iba’t ibang pinanggalingan, kultura, tradisyon sa pamumuhay, ugaling kinagisnan, at pang araw-araw na pinagdaraanan.
“Sa nangyaring ito, hangad ko na hindi lang na mas makilala pa ninyo ang isa’t isa, kundi ang igalang niyo rin ang pagkakaiba ng bawat isa at matutong rumespeto at umunawa dahil kayo ay magkakaiba ng pinagdaraanan. Sa ganitong paraan, mas titibay ang inyong samahan,” paliwanag ni Kuya sa housemates
Samantala, ipinakilala na rin sa PBB Kumunect Tayo Afternoon Show nina Melai Cantiveros at Enchong Dee ang ika-15 official housemate ng season na si Ralph Malibunas, Ang Na-Nice Boy Nanny ng France.
Ibinalita rin nina Bianca Gonzalez at Robi Domingo sa PBB Kumunect Tayo sa primetime na 14 na lamang ang natitirang aspiring housemate sa Kumu na maaaring makapasok sa bahay ni Kuya.
Subaybayan ang iba pang pangyayari sa “PBB Connect” sa primetime, 8:30 p.m. sa A2Z channel 11, Kapamilya Channel, Kapamilya Online Live, iWantTFC, at ABS-CBN Entertainment Channel.
Samahan din sina Bianca at Robi sa PBB KUMUnect Tayo ng 10 p.m. (weekdays) at 8:30 p.m. (weekends) at sina Melai at Enchong sa PBB KUMUnect Tayo Afternoon Show ng 5 p.m. sa PBB Kumu account (https://app.kumu.ph/PBBabscbn).