Maliban sa pagiging Miss Universe Philippines, may bagong titulo si Rabiya Mateo, ang “Ambassador for Education.”
“The Miss Universe Philippines Organization is excited and proud to announce our queens’ official titles,” nakasaad sa post sa official Facebook page ng pageant nitong Biyernes, Disyembre 4.
Maliban kay Mateo, tumanggap din ng bagong titulo ang mga runner-up niya.
Hinirang na “Ambassador for Arts and Culture” si first runner-up Ysabella Ysmael, isang professional ballerina, habang “Ambassador for Health and Fitness” si second runner-up Michelle Gumabao, dating varsity volleyball player na sumali na sa semi-professional league.
“Ambassador for Tourism” si third runner-up Pauline Amelinckx, na minsang nagtrabaho sa Bohol Provincial Tourism Office, habang “Ambassador for Gender Equality” naman ang fourth runner-up na si Kimberly Hakenson na umaming isang bisexual na babae.
“This group of intelligent and empowered ladies is more than ready to make an impact on causes and programs close to their hearts. The reign of phenomenal women has begun!” ayon sa organisasyon.
Sa isang panayam, sinabi ni Miss Universe Philippines Creative Director Jonas Gaffud sa Bandera na sa pamamagitan ng mga bagong titulo, mabibigyan ang mga reyna ng pagkakataon “to lead in areas they are most passionate about.”
