Poe pinatitiyak sa DepEd ang kalidad ng learning modules

Nanawagan si Senator Grace Poe sa DepEd na tiyaking mabuti at busisiin nang husto ang kalidad ng mga ipinamamahaging learning modules sa mga estudyante.

Dapat aniya sensitibo ang mga teaching personnel at sumusunod sa protocols para matiyak na mataas na kalidad ng edukasyon ang nakukuha ng mga mag-aaral.

“The task of educating children cannot be compromised. How we nurture them will determine how well the country will evolve in the future. Beyond grammar, the values we instill in them are crucial,” sabi ng senadora.

Sinabi ni Poe ang naging panghihiya sa isang showbiz personality sa isang learning module sa Occidental Mindoro ay patunay lang na kulang ang ginagawang ‘quality control’ sa learning modules.

“Parang napakahirap isipin na mayroong makakalusot na ganitong klaseng halimbawa. May binanggit na personalidad na sinasabing ‘obese’. May malisya man o wala, hindi tama para sa pangkaraniwang tao. Paano nakalusot ang gano’n?,” himutok ni Poe sa deliberasyon sa Senado sa 2021 budget ng DepEd.