Lahat ng ari-arian ng dating electric utility na Panay Electric Company (PECO) na mahalaga sa operasyon ng More Electric and Power Corp. (More Power) ay maaari nang bilhin ng bagong power firm.
Sa 22 pahinang desisyon ni Iloilo Regional Trial Court Judge Nestle Go ay kinatigan nito ang mosyon ng More Power na maisama maging ang Category C assets ng PECO sa writ of possession (WOP) na una nang ipinalabas ni Iloilo RTC Judge Emerald Requina Contreras noong Pebrero 2020.
Ang WOP na ipinalabas ni Contreras ay ang unang hakbang para sa pag-expropriate ng assets ng PECO matapos itong bawian ng prangkisa at ibigay naman ang 25 taong legislative franchise sa More Power sa bisa ng isinabatas na Republic Act 11212.
Matatandaan na sa ilalim ng prangkisa ng More Power ay binibigyan ito ng kapangyarihan na i-expropriate ang distribution assets at facilities ng PECO sa layuning na masigurong walang pagkaantala sa power supply service sa lalawigan.
Sa ilalim ng WOP na ipinalabas ni Contreras ay hinati nito sa 3 kategorya ang mga assets, kasama sa Category A at B ang mga substations sa La Paz, City Proper, Jaro, Molo at Mandurriao substations; ang Meter Lab at Power Plant Building at ang Switchboard House na nasa General Luna Street.
Habang kasama naman sa Category C ang business building office ng PECO, elevator at parking lot sa General Luna Street, City Proper; 769-square meter lot sa General Hughes, City Proper; isang 2,401-square meter lot na ginagamit bilang pole stockyard sa Diversion Road, San Rafael, Mandurriao at dalawang guest/staff houses at semi concrete canteen sa General Luna Street, City Proper
Hinarang ng PECO ang pagkuha ng kanilang assets sa ilalim ng Category C subalit sa ipinalabas na desisyon ni Go sinabi nito na ang ari-arian na nabanggit ay mahalaga para sa operasyon ng kumpanya.
“Category C properties are necessary for the maintenance and operation of the distribution systems thus the issuance of a writ of possession over the same is in order,” ayon sa desisyon ng hukom.
Sinabi ni Go na hindi na kailangan ng isang full-blown trial ukol sa nasabing kaso dahil maaari naman magpalabas ng order of expropriation ang korte.
Samantala, sinabi ni More Power Legal Counsel Atty Allana Mae Babayen-on na ang mga assets sa ilalim ng Category C ay kailangan para sa operasyon ng power firm lalo na at nakatuon sila sa pagdagdag pa ng mga substations at magagamit nila ang mga lupain at mga gusali para dito.
Kasunud ng naging desisyon ng korte, sinabi ni Babayen-on na hihintayin nila ang Court sheriff na iturn over sa More Power ang mga assets na nasa Category C gaya ng naging proseso ng naging pag-expopriate ng iba pang assets ng PECO.