Nabulabog ang mundo ng pulitika sa sinabi ng promoter na pinag-usapan daw nila ng Pambansang Kamao ang pagtakbo niya sa panguluhan sa taong 2022.
At ang hindi pa kagandahan sa panlasa ay ang sinabi diumano sa kanya ni Pacman na sana, sa kanyang inagurasyon, ay nandito ang kanyang promoter para makisaya sa kanya.
Napakalayong paglundag nu’n kung tutuusin, hindi pa man ay deklarado na ang kanyang pagtakbo sa pinakamataas na posisyon sa ating bayan, mapaghahandaan siya ng kanyang mga kalaban.
Sabi ng isang kaibigan namin, “Napakaaga naman yatang pagbubunyi ‘yun, kung totoo ngang sinabi ni Senator Pacquiao kay Bob Arum na dapat, e, nandito ang promoter niya sa inauguration niya!
“Ano ‘yun, sigurado na siyang mananalo siyang presidente? Mabuti at nilinaw niya, in bad taste ‘yung sinabi ni Bob Arum, napaka-assuming,” sabi ng aming kausap.
Matindi ang laban sa mundo ng pulitika, siguro’y alam na ngayon ni Senador Pacquiao na hindi tulad ng boksing ang pinasok niyang bagong mundo.
Sa lona ay isa lang ang kalaban niya sa pagpapalitan ng mga suntok pero sa pulitika ay buong bayan ang makikisawsaw sa kanyang paglahok sa panguluhan.