Zamboanga del Sur
NASAWI ang isang babaeng pulis habang sugatan ang kanyang hepe at isa pang kapwa alagad ng batas, nang sumalpok ang sinakyan nilang sports utility vehicle sa road railing, sa gitna ng malakas na ulan sa San Miguel, Zamboanga del Sur.
Dead on arrival sa ospital si Pat. Cleio Citz Calamba, nakatalaga sa bayan ng Dimataling, ayon sa ulat ng Zamboanga Peninsula regional police.
Nagpapagaling naman ngayon sa pagamutan sina Capt. Roger Bartiana, officer-in-charge ng Dimataling Police, at isa pa niyang tauhan na si Cpl. Annabel Morales.
Naganap ang insidente alas-3:55 ng hapon kahapon, sa bahagi ng National Highway na sakop ng Purok 5, Brgy. Limonan.
Minamaneho ni Bartiana ang kanyang Toyota Fortuner (CAK-5409) mula Pagadian City pabalik ng Dimataling, nang bigla itong mag-swerve, sumalpok sa road railing, at mahulog sa kanal.
Sa lakas ng impact ay nagtamo ang mga sakay ng Fortuner ng pinsala sa iba-ibang bahagi ng katawan.
Lumabas sa inisyal na imbestigasyon na nawalan ng kontrol sa manibela si Bartiana dahil madulas ang kalsada bunsod ng pag-ulan.
Dinala sina Bartiana sa Margosatubig Regional Hospital, kung saan idineklarang patay si Calamba. (John Roson)
– end –