COVID
NAITALA ngayong araw ang pinakamaraming bilang ng mga pasyenteng nakarekober sa Covid-19 sa Las Piñas City.
Ayon sa ulat ni City Health Office chief Dr. Ferdinand Eusebio, umabot sa 13 pasyente ang nakarekober sa virus.
Kabilang sa mga gumaling na pasyente ay mula sa mga sumusunod na barangay: BF International-CAA, Daniel Fajardo, Manuyo Dos, Pamplona Tres, Pulanglupa Dos, Talon Dos, Talon Tres, at Talon Singko.
Ayon sa ulat, nasa 264 ang kumpirmadong kaso ng Covid-19 sa siyudad kung saan 121 rito ang nakarekober na, 29 ang nasawi, isa ang probable habang 53 naman sa suspect.
Ani Dr. Eusebio, lalo pang pinaigting ng siyudad ang screening at contact tracing sa mga residenteng nakasalamuha ng mga pasyenteng nagpositibo sa sakit habang patuloy ang isinasagawang expanded targeted testing.
Target ng tanggapan na makapagsagawa ng rapid at swab testings ng 150 hanggang 200 katao kada araw.
Ikinatuwa naman ni Mayor Imelda “Mel” Aguilar ang pagtaas ng bilang ng recoveries sa siyudad.
“Patuloy po ang mga hakbang at suporta ng ating lokal na pamahalaan para mapigilan ang pagkalat ng virus sa ating siyudad,” ani Aguilar.
Dagdag niya na ang pagdami ng recoveries ay bunsod ng puspusang pagtugon ng lokal na pamahalaan sa mga kaso sa 20 barangay ng lungsod. –Liza Soriano