TATLONG kasapi ng New People’s Army ang napatay at isang sundalo ang nasugatan, nang makasagupa ng mga tropa ng pamahalaan ang rebeldeng grupo sa Bindoy, Negros Oriental.
Narekober ang bangkay ng mga napatay na rebelde, pati na mga sari-saring gamit pandigma, ayon sa ulat ng Army 303rd Infantry Brigade.
Naganap ang engkuwentro dakong alas-4 ng hapon Huwebes, sa Sitio Namunduan, Brgy. Cambudlas.
Katatapos lang magpatrolya ng mga tauhan ng 94th Infantry Battalion at Bindoy Police nang makatanggap ng impormasyon tungkol sa mga rebeldeng nangingikil doon, ayon sa ulat.
Habang palapit ang mga sundalo’t pulis sa puwesto ng mga rebelde ay sumiklab na ang palitan ng putok, na tumagal nang mahigit 30 minuto, ayon sa militar.
Bukod sa bangkay ng tatlong rebelde, nakarekober ng isang shotgun na may mga bala, bandolier na may mga magazine at bala, at isang rifle grenade.
Nakarekober din ng dalawang backpack, anim na pares ng bota, mga gamot at gamit panglunas, mga subersibong dokumento, at personal na kagamitan.
Nagsasagawa pa ng pagtugis laban sa mga nakatakas na rebelde, ayon kay Col. Inocencio Pasaporte.
“I urge the people of Bindoy as well the whole people of Negros Island to continue reporting the presence of these NPA terrorists in their communities. We will be pursuing them relentlessly to maintain peace and security,” aniya pa.