ARESTADO ang isang babae at ang kanyang anak na nagbebenta umano ng overpriced na alkohol sa Quezon City.
Kinilala ang mga naaresto na sina Jeanette Ng Sy, 54, at anak nitong si Jan Lawrence Ng Sy, 23, ng 2705 Skyline Tower, One Balete Cmpd., Balete Drive corner Aurora Blvd. Brgy. Kaunlaran, New Manila.
Sila ay naaresto sa buy bust operation ng mga tauhan ng Galas Police.
May nag-tip umano sa pulisya kaugnay ng pagbebenta ng alkohol ng mag-ina sa mataas na presyo. Ginagawa umano ang pagbebenta online.
Matapos makipag-ugnayan sa Department of Trade and Industry ay inilatag na ang operasyon.
Ibinebenta umano sa halagang P720 ang isang galon ng alkohol na ang suggested retail price ay P520.00.
Hinuli ang mga suspek alas-2:46 ng hapon kamakalawa sa Skyline Tower. Nakumpiska umano sa kanila ang 18 kahon ng Dreamcare Isopropyl alcohol, 12 galon ng Dreamcare Isopropyl alcohol, cellphone at buy-bust money.