PINAGPAPALIWANAG ngayon ng lokal na pamahalaan ng Maynila ang isang barangay chairman ukol sa isyung merong ‘selective’ na pamamahagi ng relief packs.
Ayon sa post ng Manila Public Information Office, isang complaint ang inihain kay Barangay Chairman Reynaldo Angat sa Manila Police District Special Mayor’s Reaction Team (MPD SMaRT) tungkol sa mga diumanoy pekeng listahan ng pangalan o constituents ng Barangay 251.
Ipinagutos ni Police Major Rosalino Ibay Jr., chief ng MPD SMaRT, na magpaliwanag si Angat kung bakit 29 katao na nakatira sa 1781 Almeda Street sa Tondo, Manila na nasa kanyang diumanoy listahan ay 29 ding magkakaibang pamilya.
Ayon kay Ibay, ang address ay isang private business na pagmamay-ari ng barangay chairman. Ang 29 katao ding ito ay napag-alamang mga ‘relatives’ at ‘connected workers’ sa establisimyento.
Nahaharap ngayon sa kasong paglabag sa Republic Act No. 11469 o Bayanihan to Heal as One Act, Republic Act No. 6713 o Code of Conduct and Ethical Standard for Public Official and Employees at Republic Act No. 3019 o Anti-Graft and Corruption Practices Act si Angat.
