NASAWI ang isang ginang nang mabaril ng isang retiradong pulis, habang nagmemeryenda sa Magdalena, Laguna, Sabado ng hapon.
Dinala pa sa ospital si Marisol Salosa, 44, pero di na umabot nang buhay, ayon sa ulat ng Laguna provincial police.
Naganap ang insidente dakong alas-3:30, habang naghahandang kumain ng meryendang pansit si Salosa sa kanyang bahay sa Brgy. Halayhayin.
Lumabas sa imbestigasyon na nang oras na iyo’y nag-aaway ang retiradong pulis na si Benedicto Bandioan, 66, at Romeo Garcia, 48.
Bumunot ng kalibre-.45 pistola si Bandioan at pinaputukan ang katunggali pero di tinamaan ang huli, at bagkus ay kay Salosa tumama ang bala.
Hawak na ng lokal na pulisya si Bandioan, at hinahandaan ng kasong homicide.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.