May bagong image si Vicky Morales na dapat abangan ng Kapuso viewers ngayong Pebrero?
Napanood namin ang video clip ng award-winning Kapuso news and public affairs personality kung saan iniimbitahan niya ang viewers na abangan ang bago niyang programang “Ilaban Natin ‘Yan!”
“Ibang-iba siya sa mga ginagawa ko,” pahayag ni Vicky. Sanay kasi tayong napapanood siya na seryoso sa pagbabalita sa 24 Oras o di kaya’y mala-fairy god mother sa Wish Ko Lang.
Sa title pa lang na “Ilaban Natin ‘Yan!”, mas magiging palaban pa ba si Vicky Morales? Pero isa lang ang sigurado riyan, para pa rin ito sa Serbisyong Totoo campaign ng GMA 7 na walang kupas sa paghahatid ng tulong at suporta sa bawat Pilipino.
“Para sa atin lahat itong show na ito. Kapupulutan natin ng aral at matutuwa pa tayo,” dagdag pa ni Vicky. “Hindi lang namin kayo pakikinggan, ilalaban natin yan!”
Abangan na lang natin kung ano ang mga bagong pasabog ni Vicky sa “Ilaban Natin ‘Yan!” na mapapanood na ngayong Peb. 22 na sa GMA.