JOSHUA GARCIA AT JULIA BARRETTO
USAP-USAPAN ngayon sa social media ang isang video kung saan nagdedmahan umano ang ex-couple na sina Joshua Garcia at Julia Barretto. Mahigit kalahating milyon na ang nahamig na views at comments ng nasabing video sa YouTube na ipinost ng isang Jan Milo Severo.
May titulo itong “Joshua Garcia at Julia Barretto dedma sa isat-isa sa backstage ng Chinese New Year celebration.”
Mapapanood dito ang sinasabing “isnaban scene” ng dating magdyowa na kuha umano sa isang lugar kung saan nag-promote ang dalawa para sa zombie movie nilang “Block Z”. Sa video, makikitang unang naglalakad patungong backstage si Julia habang nakasunod naman sa kanya si Joshua.
Sa isang bench umupo si Julia pero hindi tumabi sa kanya si Joshua na tumayo lang ilang metro mula sa kinaroroonan ng ex-girlfriend. Kapansin-pansin din na tila hindi nagtitinginan ang dalawa kaya naman ang paniwala ng netizens, hindi talaga sila okay ngayon.
Ilang netizens naman ang nagsabi na baka may pinagdaraanan lang ang dalawa kaya hindi sila nagpapansinan at hiling nila na sana’y maayos din ang kanilang problema dahil sayang naman ang kanilang friendship.
Pero in fairness, kahit na nga balitang hindi maayos ang relasyon ng dating magdyowa, nagpapaka-professional pa rin sila sa ngalan ng kanilang mga trabaho at commitment. Kamakailan, in-unfollow na ni Julia sa Instagram si Joshua pati na ang nali-link ngayon sa binata na si Janella Salvador.