Sa paghihiwalay nila ni Mico Palanca ilang taon na ang nakararaan ay naging maayos ang pakikipagrelasyon ni Bea Alonzo sa pamilya ng namayapang aktor.
Napanatili ni Bea ang magandang komunikasyon sa pamilya ng kanyang dating boyfriend, walang naging pagbabago, sila lang ni Mico ang nagkahiwalay.
Hanggang ngayon ay may magandang relasyon sila ng mga tiyahin ni Mico, lalo na ang mga kapatid ng aktor, hindi ‘yun nasira kahit kailan.
Nakiramay si Bea nang pumanaw si Mico, pinuntahan niya ang pamilya, kasama ang dati nilang handler ni Mico na si Monch.
Maraming natuwa sa ginawa ni Bea, mapagpahalaga nga naman siya sa pinagsamahan, hindi siya nakalilimot.
Maganda naman kasi ang paghihiwalay nila ng namayapang aktor, hindi sila nagkasaulian ng kandila, kaya buung-buo pa rin ang relasyon ni Bea at ng pamilya ng kanyang ex.
Tanong ng marami, ganu’n din daw kaya ang relasyong meron si Bea sa pamilya ni Gerald Anderson, napanatili kaya niya ang pagmamahal sa mga miyembro ng pamilya ng aktor na sinasabing nanakit sa kanya nang wagas?
Puwedeng hindi, dahil kahit naman ang mommy ng aktor ay nagsabi na hindi sila naging close ni Bea Alonzo, kaya walang lilingunin ang aktres sa nawasak nilang relasyon ni Gerald.