Kris kay Krissy Achino: I like you, you have the correct diction!

KRIS AQUINO

Tinupad ng Queen of Social Media na si Kris Aquino ang isa sa mga wish ng kanyang impersonator at vlogger na si Chino Liu o mas kilala ngayon bilang si Krissy Achino.

Sumikat si Chino dahil sa panggagaya niya kay Tetay, lalo na nang lumabas ang video niya na ginagaya ang mommy nina Joshua at Bimby habang lumilindol. Talagang nag-viral ito hanggang sa mapanood ni Kris.

At nito ngang nakaraang linggo, nagkakilala na finally ang dalawa sa isang mall. Hinanap at pinapunta raw talaga ni Kris si Chino roon dahil nabalitaan niya na gustung-gusto siyang makita ng gay impersonator. Una na silang nagkausap sa programa ni Willie Revillame na Wowowin nang maging contestant si Chino sa isang segment ng programa.

“Nice to meet you at last Chino. You know what, natutuwa ako kasi ikaw ‘yung talagang gayang-gaya ako. Thanks for doing a good job. Kasi alam ko inaaral mo talaga ako. I like you because you have the correct diction. It annoys me kapag mali ang diction,” papuri ni Kris sa vlogger.

Ikinuwento ni Chino kung kailan niya sinimulang gayahin si Kris, “When I was looking for a job, three months after, I went viral because I did different impersonations of ‘What if celebrity,’ including you, ‘yung navigation voice sa Waze, and as time passed by ikaw na lang ‘yung hinahanap nila, so tinutluy-tuloy ko na.”

Tinanong din ni Kris kung may dyowa siya, “Wala, I’m focused on my career. Ako para sa akin ‘yung lovelife darating naman ‘yan.” Ipinagmalaki rin ni Chino na mas gusto muna niyang tulungan ngayon ang kanyang pamilya lalo na ang kanyang nanay.

Tuwang-tuwa naman ang TV host-actress nang malaman na kumikita na rin si Krissy sa panggagaya sa kanya pero ang ikinagulat niya nang bonggang-bongga ay nang malamang kaedad (24 years old) lang pala nito ang panganay na si Josh.

Bago tuluyang magpaalam, nangako si Kris sa kanyang impersonator na reregaluhan niya ito ng hikaw para magamit niya sa panggagaya sa kanya.