MEL MARTINEZ AT MARICEL SORIANO
Malaking-malaki na ang ibinagsak ng timbang ngayon ng Diamond Star. May humpak na ang kanyang magkabilang pisngi na tanda ng pagpayat, hindi na rin dumodoble ang kanyang baba sa pictorial, nagtagumpay si Maricel Soriano sa pagdyi-gym.
’Yun kasi ang matagal na niyang hindi masyadong napagtutuunan ng pansin, hindi tulad nu’ng nabubuhay pa ang kanyang dakilang inang si Mommy Linda Martinez na talagang magkasabay silang nagdyi-gym, kinakarir nila ang pag-eehersisyo.
Masayang-masaya si Mel “Bunso” Martinez sa pagkukuwento nang dumaan ito sa aming gallery. Dumalo si Marya sa selebrasyon ng kanyang kaarawan, nag-dinner silang magkakapatid, saka ilang piling-piling mga kaibigan.
Ipinakita sa amin ni Bunso ang mga pictures nilang magkakapatid, malaki na nga ang ipinayat ng kanyang ate, bumabalik na sa dati ang katawan ng Diamond Star.
Kuwento ni Mel, “Kami-kami lang ang magkakasama sa dinner, kaya puro kuwentuhan ang nangyari sa buong time na nandu’n kami. Si Ate Marya ang bangka nang bangka, aliw na aliw kami sa kanya,” kuwento ni Mel na patuloy na nagtatagumpay sa kanyang negosyong Pan Familia.
Sobrang close sa isa’t isa ang magkakapatid, pinalaki silang magkakabigkis. Para silang walis-tingting na manipis lang pero magkakasama sa anumang laban.
Balik-sigla na ang career ni Maricel, meron siyang pelikulang malapit nang ipalabas, ang “The Heiress” ng Regal Films at may gagawin din siyang bagong serye sa ABS-CBN.
Napakaligaya namin para kay Taray!