ALDEN RICHARDS
Mas lalo pang tumitindi ang mga kaganapan sa tinututukan ng mga Kapuso viewers na The Gift sa GMA Telebabad.
Mainit na namang pinag-usapan sa social media ang nakaraang episode ng seryeng pinagbibidahan ni Alden Richards matapos na makidnap ng mga armadong lalaki ang karakter niyang si Sep.
Siyempre, alalang-alala na ang kanyang nanay-nanayan na si Strawberry (Jo Berry) at lolang si Lola Char (Elizabeth Oropesa) dahil sa pagkawala ng binata. Kaya agad silang sumugod sa police station para i-report ang kaso.
Kasabay nito, nagpakita rin kay Helga (Sophie Albert) ang kaluluwa ni Gener (TJ Trinidad), ang tunay na ama ni Sep. May nais kasi itong ipakita na posibleng pinagdalhan sa kanyang anak. O, baka may iba pang gustong ipahiwatig ang kaluluwa ni Gener kaya ito muling nagparamdam?
Yan ang dapat abangan at iba pang nakakagulat na twists sa pagpapatuloy ng The Gift pagkatapos ng Beautiful Justice.