JOLO REVILLA AT ANGELICA ALITA
SA panayam namin kay Senador Bong Revilla sa digital show namin nina Manay Lolit Solis at Mr. Fu na “Take It… Per Minute, Me Ganu’n” ay nagkataon namang dumalaw sa kanyang ama si Vice-Governor Jolo Revilla.
Natural, hindi na namin pinalampas pa ang pagkakataon, pinaupo na rin namin sa interbyu ang vice-governor ng Cavite na maaliwalas na maaliwalas ang aura ngayon.
Ang nagagawa nga naman ng pag-ibig. Ang nagagawa nga naman ng inspirasyon mula sa isang minamahal at nagmamahal din sa kanya na si Angelica Alita.
Ayaw pang magbigay ng mga detalye ni Vice-Governor Jolo tungkol sa nalalapit nilang pagpapakasal ng beauty queen, pero malakas ang ikot ng balita na magaganap na ang kasalan sa December, sa Amerika sila magpapakasal.
Maraming nanghihinayang sa halos dekada na nilang naging relasyon ni Jodi Sta. Maria, pero sabi nga ni Senador Bong, “Kung saan maligaya ang mga anak namin, maligaya na rin kami para sa kanila.”
Nagniningning ang mga mata ng batambatang aktor-pulitiko, kitang-kitang maligaya siya sa piling ni Angelica, hindi na kailangan pang ipagtanong ‘yun.