JAMES REID AT NADINE LUSTRE
Siguradong sa pagtalikod ni James Reid sa management ng Viva Artists ay nawindang ang career ni Nadine Lustre. Natural, dahil sila ang magka-loveteam, paano na ngayon ang kanyang career?
Hindi naman siguro itutuloy ng Viva ang kanilang tambalan dahil wala na sa kanila si James, ang ama na nito ang magpapatakbo ng kanyang karera, may bagong plano siyempre ang management ng Viva para sa dalaga.
Saan na pupunta ngayon ang career ni Nadine ngayong binaklas na sa Viva ng kanyang ama si James?
Maganda ang takbo ng kanilang career nu’n bilang magka-loveteam, kumikita ang kanilang mga pelikula, sino kaya ang bagong itatambal ngayon kay Nadine?
‘Yun ang mahirap kapag umaasa lang sa loveteam ang artista, kapag nabuwag ang tambalan, para na siyang naliligaw. Babalangkasin na naman ng nag-aalaga sa kanya ang magiging takbo ng kanyang career na nag-iisa na lang siya.
Sayang na sayang ang kailang loveteam ni James Reid, ‘yun pa naman ang ipinangsasabong sa tambalang KathNiel, nakalutang ngayon ang career nila ni James.
Pero hindi pa naman katapusan ng mundo ang nangyari kay Nadine sa pag-alis ni James sa Viva, magaling siyang umarte na napatunayan na niya sa maraming pelikulang ginawa niya, huwag nating kalilimutan na may
hawak na siyang parangal bilang pinakamahusay na aktres.
Mahihirapan lang sa simula si Nadine Lustre pero sa katagalan ay maiisip na rin niya na ang pagkawala ng loveteam nila ni James Reid ay hindi magpapahinto ng kanyang mundo bilang artista.