MAHIRAP ang posisyon ng mga hurado sa Tawag Ng Tanghalan sa It’s Showtime. Lalo na ang tumatayong punong-hurado, puro pamba-bash ang kanilang tinatanggap mula sa mga kumokontra sa kanilang paghusga, sobrang personal ang mga upak sa kanila.
Inupakan nu’n si Jaya na punong-hurado sa labanan, ano raw ang karapatan nitong ma-ging judge sa TNT, samantalang sintunado nga itong kumanta?
Ang magaling na singer-composer na si Rey Valera ay hindi rin nakaligtas, hindi na raw uso ngayon si Rey, matanda na kasi at mahina na ang tenga nito sa pagkilatis ng sintunado at magaling kumanta.
Ang pinakahuli ay ang Asia’s Diva na si Dulce, inupakan siya nang sobrang personal dahil bilang punong-hurado nu’ng araw na maglaban sina Marian at Mariko ay ang transgender ang kanyang i-pinanalo, pinakain ng ampalaya si Dulce nang dahil du’n.
May mga nagdedepensa naman sa kanya, totoong magaling kumanta si Marian, pero nu’ng araw na maging magkalaban sila ni Mariko ay higit na mas magaling ito.
“Sa anumang labanan po, e, isa lang ang mananalo. Paborito ko si Marian, hanga ako sa talent niya, pero hindi ako manghihingi ng sorry kung si Mariko ang nanalo dahil ‘yun lang ang nararapat,” emosyonal na pahayag ng magaling na singer.
Napakaparehas ni Dulce sa pagiging punong-hurado, nararamdaman niya ang emosyon ng mga kalahok, dahil minsan isang panahon ay dumaan din siya sa pagiging kontesera sa kanilang probinsiya.