NASAWI ang isang babaeng college student nang saksakin ng kanyang nobyo, sa Tabaco City, Albay, Martes ng gabi.
Nakilala ang nasawi bilang si Jackielyn Cellona, 23, kumukuha ng kursong business administration sa Dr. Carlos Lanting College, at residente ng bayan ng Malinao, ayon sa ulat ng Tabaco City Police.
Sumuko naman sa mga pulis ang suspek na si Ryan Carale, 23, residente ng Bacacay.
Naganap ang insidente pasado alas-6 sa Purok 1, Brgy. San Antonio.
Nadiskubre ng isang residenteng bibili sana ng pagkain sa tindahan ang bangkay ni Cellona na nakahandusay at duguan sa kalsada, dakong alas-7.
Napag-alaman na bago iyo’y nakita si Carale na mabilis na naglalakad at nagmaneho ng isang tricycle palayo sa pinangyarihan.
Sa kasagsagan ng imbestigasyon, naiulat sa lokal na pulisya na sumuko ang suspek sa Bacacay Police.
Napag-aalaman pa na sinundo ni Carale si Cellona matapos ang klase ng huli, bago naganap ang krimen.
Pagseselos ang tinitingnang aanggulo sa pagpatay, habang hinahandaan ng kasong murder ang suspek.