NORA AUNOR AT SANYA LOPEZ
Superstar si Nora Aunor, kanyang-kanya ang titulong ‘yun at walang sinumang makaaagaw sa kanyang trono, pero tao pa rin ang Superstar at hindi imortal.
Sa kanyang edad ngayon na sixty six na ay natural lang na meron na siyang mga nararamdamang kakaiba sa kanyang katawan, kailangan na niyang humingi ng tulong sa mga vitamins, maitatago ang edad pero ang nararamdaman ay hindi.
Sakitin na ngayon si Nora, pero mga ordinaryo namang sakit ‘yun na sabi nga ay malayo sa bituka, ‘yun ang dahilan kung bakit nagbibigay siya ng oras sa kanyang pagtatrabaho.
Maaga siyang dumarating para maaga rin siyang makunan, maaga rin ang kanyang pack-up, hindi na siya puwede sa magdamagang pagtatrabaho.
Sa pakikipagkuwentuhan namin sa magandang aktres na si Sanya Lopez na kasama ng Superstar sa bago niyang pelikula ay hindi matapus-tapos ang papuri ng magandang dalaga sa Superstar.
Sabi ni Sanya, “Napakasuwerte ko po dahil nabigyan ako ng chance na makatrabaho ang Superstar. Iba po, ibang-iba ang experience, napakahusay po talaga niyang umarte.
“Kapag tinititigan ka na niya, meron pong ibang feeling na hindi mo alam kung saan nanggagaling, basta, mame-mesmerize ka na lang sa kanya,” masayang kuwento ni Sanya Lopez.
Sabi nga, napakaraming bituin sa langit pero may isang uri ng bituin na nakasisilaw ang liwanag, ‘yun ang bituin ng nag-iisang Superstar na si Nora Aunor.