ALDEN RICHARDS AT JOSHUA GARCIA
Sa matagal na pagkawala ni John Lloyd Cruz ay maraming male personalities na nabigyan ng daan para maipakita ang husay nila sa pagganap. Sina Alden Richards at Joshua Garcia.
Silang dalawa ang palaging ikinukumpara kay JLC ang acting. Magaling naman talaga si Joshua Garcia, nangungusap ang kanyang mga mata, kahit walang dayalog ay tumatawid ang galing niya sa pag-arte sa manonood.
Siya na raw ang batang John Lloyd. Si Joshua na raw ang pumalit sa binakanteng posisyon ng aktor na mas pinili ang kanyang pribadong buhay nang halos tatlong taon.
Nang magtagumpay naman ang pelikulang “Hello, Love, Goodbye” nina Kathryn Bernardo at Alden Richards ay maraming naghambing sa Pambansang Bae kay John Lloyd.
Binigyan daw ni Lloydie ng pagkakataong umangat ang talentong matagal nang itinatago ni Alden. Halos magkapareho raw ang kanilang atake sa pagganap, kaya komento ng marami ay si Alden na ang bagong John Lloyd.
Siyempre’y may kani-kanyang atake naman sa pag-arte sina Lloydie, Alden at Joshua, ‘yung pagganap na kanilang-kanila lang, pero meron silang iisang katangian.
Pare-pareho silang magagaling na aktor.