Bangka lumubog sa karagatan ng Calbayog: 59 na-rescue

NAILIGTAS ang 59 pasahero matapos lumbog ang isang pampasaherong bangka na kanilang sinasakyan sa karagatan ng Calbayog City, Samar, Lunes ng umaga.

Kabilang sa mga nailigtas ay 52 pasahero at pitong crew ng M/B Miar Romces, ayon sa ulat mula sa Eastern Visayas regional police.

Nangyari ang insidente sa karagatan malapit sa Brgy. Matobato, ganap na alas-11:30 ng umaga.

Kaaalis pa lamang ng M/B Miar Romces sa Calbayog City port sa Brgy. Aguit-itan, nang lumubog ito dahil sa malalaking alon bunsod ng habagat, ayon pa sa ulat.