Robotics team ng PH naka-silver sa int’l competition

NAKASUNGKIT ng Silver Award ang Philippine Robotics National Team sa FIRST Lego League (FLL) Asia Pacific Open Championship sa Sydney, Australia.
Ang national team na “Gracean Whiz” mula sa Grace Christian College, ay nakakuha ng Silver Award for Gracious Professionalism sa kompetisyon na nilahukan ng 43 teams mula sa 21 bansa.
Ang Gracean Whiz ay binubuo nina Alexis Diane Ngo, Heart Bernice Tan, Gen Bernardine Dy, Denzell Robyn Dy, Ethan Russell Uy, Zoe Angeli Uy, Arabelle Galupe, Ziyang Zhang, Kylie Danielle Sy, at Christian So. Ang kanilang coaches ay sina Arlyn Jordan at Warren John Ong Pe.
Ang Grace Christian College ay Top 7 sa Robot Game at kinlal ang kanilang proyektong INFINITY BOARD, isang innovative solution para magkaroon ng recreational activities sa kalawakan. Binubuo ito ng portable tabletop board game system.
Layunin ng board game na pawiin ang lungkot ng mga astronaut na nasa kalawakan.
Sumali rin sa kompetisyon ang Livingstone International School mula sa Angeles City at naka-Top 3 sa Teamwork-Core Values sa kanilang Project Spirulina, na nakasentro sa pagpaparami ng Spirulina, isang Bioluminescent bacteria at Kilo power para panggalingan ng enerhiya sa kalawakan.
Pinuri ni Dr. Josette Biyo, direktor ng Department of Science and Technology-Science Education Institute, ang mga kalahok.
“These are truly impressive wins and indicative of Filipinos’ growing interest and talent in robotics. But more than that, we thank the team for exemplifying the values we hope all our young scientists would possess,” ani Biyo.