PINAYUHAN ng Kapuso TV host-actress na si Heart Evangelista ang mga artista hopefuls na natanggal agad sa Season 7 ng StarStruck.
Isa si Heart sa mga judge ng original artista search ng Kapuso Network at sa pagsisimula pa lang ng programa nitong nakaraang weekend ay may mga contestants na agad ang natsugi sa laban.
Sey ni Heart, hindi dapat mawalan ng pag-asa ang mga hindi nagwawagi sa mga contests. Hindi pa naman daw ito ang katapusan ng lahat, kailangang magpursige at mas galingan pa raw nila ang kanilang ginagawa.
“Just because you didn’t get it doesn’t mean it’s not for you. You just have to keep trying,” payo ng misis ni Chiz Escudero.
Naniniwala rin ang aktres na ang tagumpay ng isang artista ay talagang itinadhana pero kailangan ding magsipag at maging bukas sa anumang pagbabago ang isang hopeful.
“If it’s something that you really want to do, and if it’s really for you, siguro po the stars will align and it will happen,” aniya pa.
In fairness, nag-trending at talagang pinag-usapan agad ng mga viewers at netizens ang pagsisimula ng StarStruck.
Napapanood ang StarStruck Season 7 tuwing Sabado 7:55 p.m. at Sunday tuwing 7:40 p.m..