ANIM katao ang nasawi at 18 pa ang nasugatan nang mahulog ang pampasaherong jeepney sa isang bangin sa Libon, Albay, Martes ng hapon, ayon sa pulisya.
Inaalam pa ng lokal na pulisya ang pagkakakilanlan ng mga nasawi at mga nasugatan, na pawang mga dinala sa Pantao District Hospital, habang isinusulat ang istoryang ito.
Naganap ang insidente sa Sitio Hulandig, Brgy. San Jose, alas-3, ayon sa inisyal na ulat ng Bicol regional police.
Minamaneho noon ni Rolando Olade ang dilaw na jeepney (EVF-366), na may aabot sa 30 sakay, mula Brgy. Pantao patungong Centro Poblacion.
Lumabas sa inisyal na imbestigasyon na habang dumadaan sa isang kurbada ang jeepney ay nagloko ang preno, hanggang sa ito’y nahulog sa bangin.
Hinahanap pa si Olade, na sinasabing tumakas matapos ang insidente.