PATAY ang isa umanong asset ng militar nang pagbabarilin ng mga hinihinalang kasapi ng New People’s Army sa Bulusan, Sorsogon.
Itinakbo pa sa pagamutan si Dennis Espano, 28, ngunit binawian ng buhay dahil sa mga tama ng bala sa katawan, ayon sa ulat ng Sorsogon provincial police.
Naganap ang insidente dakong ala-1:30 ng hapon Lunes, sa Brgy. Poctol.
Nagmamaneho si Espano ng tricycle, na inupahan para maghatid ng mga dadalo sa isang libing, nang pagbabarilin ng mga armadong naka-motorsiklo.
Sugatan naman sina Zoren Furio, 21, at Lilian Monteo, 54, nang tamaan ng mga ligaw na bala sa kamay at balikat.
Sa imbestigasyon, napag-alaman na si Espano ay dating courier ng NPA.
Pinaghinalaan umano siya ng mga rebelde na nagbibigay na ng impormasyon sa mga tropa ng pamahalaan.